"Milan" yarim himoyachisi Kristian Pulishich A Seriyaning 36-turi doirasidagi "Atalanta"ga qarshi uy uchrashuvi oldidan o‘tkazilgan so‘nggi mashg‘ulotda jarohat oldi.
Jurnalist Djanluka Di Marsio bergan ma’lumotlarga ko‘ra, amerikalik futbolchi dumba mushaklarini shikastlab olgan. Natijada Massimiliano Allegri boshchiligidagi murabbiylar shtabi so‘nggi soatlarda taktik rejalarga o‘zgartirish kiritishga majbur bo‘ldi. Ta’kidlanishicha, asosiy tarkibda Pulishichning o‘rnini Rafael Leau egallaydi. Futbolchining jarohati qay darajada jiddiy ekani va tiklanish muddati tibbiy ko‘rikdan so‘ng ma’lum bo‘ladi.
"Atalanta"ga qarshi bahs "Milan" uchun Chempionlar ligasi yo‘llanmasini qo‘lga kiritishda strategik ahamiyatga ega. Kecha "Yuventus"ning "Lechche" ustidan qozongan g‘alabasidan so‘ng, 67 ochkoga ega "rossonerilar" turnir jadvalida 4-o‘ringa tushib ketdi. Ayni damda milanliklar 5-o‘rindagi "Komo"dan (36 o‘yinda 65 ochko) ikki ochko, bitta zaxira o‘yiniga ega "Roma"dan (64 ochko) esa uch ochko oldinda bormoqda.
Eslatib o‘tamiz, "Milan" va "Atalanta" jamoalari o‘rtasidagi bahs bugun Toshkent vaqti bilan soat 23:45 da boshlanadi.
