Германиялик ярим ҳимоячи Брайан Груданинг «РБ Лейпциг» клубидаги келажаги яна номаълум бўлиб қолмоқда.

Bild нашрининг хабар беришича, клуб мавсумнинг сўнгги уй учрашувига режалаштирилган 21 ёшли футболчи билан хайрлашиш маросимини охирги лаҳзада бекор қилган. Дастлаб «Лейпциг» раҳбарияти «Брайтон»дан ижарага олинган ярим ҳимоячи билан хайрлашишга қарор қилган эди, бироқ музокаралардан сўнг режалар ўзгарган.

Клуб раҳбарияти Груданинг мавсумнинг иккинчи ярмидаги ўйинларидан мамнун ва чемпионат якунланганидан сўнг «Брайтон» билан музокараларни давом эттирмоқчи. Инглиз клуби футболчини тахминан 30 миллион еврога баҳоламоқда. Вазиятнинг эҳтимолий ечимларидан бири сифатида футболчини кейинчалик сотиб олиш ҳуқуқи ёки мажбурияти билан қайта ижарага олиш варианти кўриб чиқилмоқда.

Маълумот учун, Брайан Груда жорий мавсумда немис клуби сафида 12 та ўйинда майдонга тушиб, 3 та гол ва 3 та голли узатмага муаллифлик қилди. Иқтидорли футболчи Германиянинг асосий терма жамоасидан ташқари барча ёшдаги терма жамоаларида тўп сурган.