Лондоннинг "Челси" клуби янги бош мураббий излаш ишларини давом эттирмоқда. The Telegraph нашрининг хабар беришича, номзодлар рўйхатига "Кристал Пэлас" устози Оливер Гласнер ва "Фламенго" собиқ мураббийи Филипе Луис қўшилди.

Шунингдек, клуб раҳбарияти айни дамда "Комо" жамоасини бошқараётган Сеск Фабрегас номзодини ҳам муҳокама қилган. Аввалроқ ОАВда "Челси" бош мураббийлиги учун Хаби Алонсо, Андони Ираола ва Марку Силва каби мутахассислар даъвогарлик қилаётгани ҳақида хабарлар тарқалган эди.

Қайд этилишича, ҳозирча номзодлар орасида яққол фаворит йўқ. Клуб раҳбарияти шошилмасдан, жамоа лойиҳасига энг мос келадиган мураббийни танлаб олмоқчи.

Эслатиб ўтамиз, "Челси" раҳбарияти янги бош мураббийни Жаҳон чемпионати — 2026 стартига қадар тайинлашни мақсад қилган.