«Халл Сити» АПЛ йўлланмаси учун Чемпионшип плей-офф босқичи ярим финалининг иккинчи ўйинида «Миллуол» устидан ғалаба қозонди — 2:0. Баҳс Лондондаги «Ден» стадионида бўлиб ўтди.

Голларга жазоирлик ҳужумчи Муҳаммад Беллуми (64-дақиқада) ва инглиз форварди Жо Гелхардт (79-дақиқада) муаллифлик қилишди. Беллуми голдан ташқари ўз ҳисобига голли узатмани ҳам ёздириб қўйди.

Дастлабки ўйинда жамоалар гол уришмаган эди. Икки ўйин натижасига кўра, «Халл Сити» плей-офф финалига йўл олди.

Иккинчи финалчи номи «Саутгемптон» ва «Мидлсбро» қарама-қаршилигида аниқланади. Ушбу жамоалар ўртасидаги илк баҳс 0:0 ҳисобида якунланган. Жавоб ўйини 12 май куни бўлиб ўтади.

Аввалроқ «Ковентри Сити» ва «Ипсвич» турнир жадвалида 1 ва 2-ўринларни эгаллаб, тўғридан-тўғри АПЛга йўл олган эди. «Миллуол» мавсумни учинчи, «Халл Сити» эса олтинчи поғонада якунлаган.

Чемпионшип Юқори дивизионга чиқиш учун плей-офф 1/2 финал. Жавоб ўйини

«Миллуол» — «Халл Сити» — 0:2 (0:0)

Голлар: Беллуми (64), Гелхардт (79). Биринчи ўйин: 0:0.