«Наполи» бош мураббийи Антонио Конте А Сериянинг 36-турида «Болонья»дан қабул қилиб олинган мағлубият (2:3) ҳақида тўхталиб ўтди.

«Агар прессинг қилмоқчи бўлсангиз, буни тўғри бажаришингиз керак, чунки ярим куч билан ҳаракат қилсангиз, шунчаки беҳуда югурган бўласиз. Прессингда қатъиятлироқ бўлишимиз мумкин эди, бироқ жорий мавсумда биринчи марта 0:2 ҳисобида ортда қолганимиз йўқ, демак бу тасодиф эмас. Кўриниб турибдики, ўйин бошиданоқ диққатлироқ бўлишимиз зарур, чунки бу ҳолат такрорланмоқда.

Биз вазиятни ўнглаб, ғалаба қозониш учун бор кучимизни ишга солдик. Аммо ғалаба қозона олмасанг, ҳеч бўлмаганда мағлуб бўлмасликка ҳаракат қилишинг керак. Мағлубиятга лойиқ эдик деб ўйламайман, лекин футболда шунақаси ҳам бўлиб туради.

Олдинда яна иккита ўйин бор. Куч тўплаб, Чемпионлар лигаси йўлланмасини нақд қилишимиз ва ўзимизни энг яхши томондан кўрсатишимиз керак. Ўйиндан хафа эмасман, бугун йигитлар ўз вазифаларини бажаришни хоҳлаганини кўрдим, бироқ баъзида кутилмаган бурилишлар бўлиб туради», — деди Конте DAZN Italia нашрига берган интервьюсида.