«Барселона» ва «Реал» ўртасидаги учрашувда Гави ҳамда Винисиус Жуниор ўртасида юзага келган даҳанаки жанг тафсилотлари маълум бўлди.

10 май куни бўлиб ўтган «эл-класико»да «Барселона» мадридликлар устидан 2:0 ҳисобида ғалаба қозониб, жорий мавсумдаги чемпионликни қўлга киритди. Ўйин давомида икки футболчи ўртасида кескин тўқнашув юз берди.

Movistar телеканалининг «El Día Después» дастури намойиш этган кадрларга кўра, Гави Винисиусга унинг «Олтин тўп»ни қўлга кирита олмаганини эслатган. Бунга жавобан бразилиялик вингер шундай деган: «Тўғри, лекин менда Чемпионлар лигаси соврини бор. Мен Чемпионлар лигасида ғолиб чиққанман».

Шунингдек, Винисиус «Мен хотиржамман, хотиржамман», деб қўшимча қилган. Гави эса унинг гапини бўлиб: «Шунчаки ўйинингни ўйна ва овозингни ўчир», дея жавоб қайтарган.