«Реал» жамоа футболчиси Федерико Вальвердега нисбатан қўлланилиши мумкин бўлган турли санкция вариантларини кўриб чиқмоқда.
Аввалроқ, Вальверде машғулотдан сўнг жамоадоши Орельен Тчуамени билан муштлашиб кетгани маълум бўлган эди. Тўқнашувнинг ҳар икки иштирокчиси 500 минг евро миқдорида жаримага тортилди. Sport.es нашрининг таъкидлашича, «Реал» Вальвердени сардорлик боғичидан ҳам маҳрум қилиши мумкин.
ОАВ маълумотларига кўра, Вальверде сардорлик мақоми учун зарур бўлган намунали хулқ-атвор соҳиби эмас. Унинг етакчилик фазилатларига нисбатан шубҳалар ҳали Хаби Алонсо бош мураббий бўлиб ишлаётган даврдаёқ пайдо бўлган эди.
Энг кескин чора сифатида «Реал»нинг асосий активларидан бири бўлиб қолаётган Вальвердени сотиб юбориш варианти кўрилиши мумкин. 27 ёшли уругвайлик футболчининг трансфер қиймати 120 млн еврога баҳоланмоқда.
