«ПСЖ» ўзининг расмий сайтида жамоадаги кадрлар ҳолати бўйича маълумот эълон қилди.
Унга кўра, ярим ҳимоячи Ли Кан-Ин «Брест»га қарши ўйинда тўпиғидан жароҳат олгани сабабли яқин вақт ичида тренажёр залида машғулот ўтказади. Люка Шевалье, Ашраф Ҳакимий ва Кентен Нджантула тренажёр залида индивидуал тарзда шуғулланмоқда.
Вильян Пачо, Нуну Мендеш ва Уоррен Заир-Эмери эса тикланиш дастури асосида иш олиб боришмоқда.
Эртага, 13 май куни «ПСЖ» сафарда «Ланс»га қарши майдонга тушади. Луис Энрике шогирдлари сўнгги тур олдидан Франция чемпионлигини нақд қилишлари учун ушбу ўйинда дуранг қайд этишлари кифоя.
