«Манчестер Сити» бош мураббийи Хосеп Гвардиола АПЛ доирасида «Кристал Пэлас»га қарши бўлиб ўтадиган ўйин борасидаги кутишлари билан ўртоқлашди. Учрашув 13 май куни бўлиб ўтади.

Испаниялик мутахассис Лондон клуби анъанавий тарзда унинг жамоасига жиддий муаммолар туғдиришини таъкидлади.

«Улар билан ўйинлар ҳар доим қийин кечган — Рой Хожсон даврида ҳам, ҳозирги Оливер Гласнер қўл остида ҳам шундай. Бу топ-жамоа, уларни мағлуб этиш жуда мушкул. Таркибда ротация бўлган тақдирда ҳам, жамоанинг сифати йўқолмайди», — дея Гвардиоланинг сўзларини келтирмоқда BBC.

«Шаҳарликлар» устози чемпионлик учун кураш кетаётганига қарамай, жамоа ичидаги босим ўзгармаганини қайд этди:

«Босим бир кун олдин, бир ҳафта ёки икки ҳафта олдин қандай бўлса, шундайлигича қолмоқда. Ҳаммаси аввалгидек».

Гвардиола таркиб бўйича ижобий янгиликлар борлигини ҳам қўшимча қилди: ярим ҳимоячи Родри ўзини яхши ҳис қилмоқда ва машғулотларда иштирок этиши мумкин. Ҳимоячи Абдуқодир Ҳусанов эса «Эвертон» билан ўйинда олган жароҳатидан сўнг сафга қайтишга яқин турибди.

Айни дамда «Манчестер Сити» битта захира ўйинига эга ҳолда «Арсенал»дан 5 очко ортда қолиб, иккинчи ўринда бормоқда. «Кристал Пэлас» эса 15-поғонани эгаллаб турибди.