«Ювентус» «Реал» клуби билан бир нечта футболчи бўйича кенг кўламли музокара ўтказишни режалаштирмоқда, деб хабар бермоқда Tuttosport нашри.

Турин клуби Браим Диас ҳамда «Кастилья» ҳужумчиси Гонсало Гарсияни ўз сафига қўшиб олишга қизиқиш билдирган. Италияликлар 21 ёшли ҳужумчини Бернарду Силвага муқобил вариант сифатида кўрмоқда ва Мората трансферига ўхшаш, қайта сотиб олиш ҳуқуқи билан ижара схемасини таклиф қилишга тайёр.

Шунингдек, эҳтимолий битим доирасида «Ювентус» «Реал»га туркиялик истеъдод Кенан Йилдизни сотиб олиш бўйича устувор ҳуқуқ беришга тайёр экани айтилмоқда.

Бундан ташқари, туринликлар Давид Алабани ҳам қўлга киритиш устида иш олиб бормоқда. Австриялик ҳимоячининг «Реал» билан шартномаси ёзда якунланади ва унга эркин агент мақомида расмий таклиф ҳам йўллангани хабар қилинмоқда.