Испания терма жамоаси бош мураббийи Луис де ла Фуэнте португалиялик мутахассис Жозе Моуриньонинг Мадриднинг «Реал» клубига қайтиши мумкинлиги борасидаги хабарларга ўз фикрини билдирди. Бу ҳақда Sport.es нашри хабар бермоқда.
«Реал» Моуриньони қайтариб тўғри қиляптими ёки йўқ, буни айта олмайман. Аммо у — кучли мутахассис», — дея иқтибос келтиради нашр Испания терма жамоаси устозининг сўзларидан.
Аввалроқ, «The Special One» лақаби билан машҳур мураббий 2025/2026 йилги мавсум якунланганидан сўнг Мадрид грандини бошқариши мумкинлиги ҳақида хабарлар тарқалган эди. Ҳозирда Моуриньо Португалиянинг «Бенфика» клубида фаолият юритмоқда.
Эслатиб ўтамиз, Жозе Моуриньо 2010 йилдан 2013 йилгача «қаймоқранглилар»ни бошқарган. Унинг қўл остида жамоа Испания Ла Лигаси, мамлакат Кубоги ва Суперкубогида зафар қучган.
