«Арсенал» ҳужумчиси Леандро Троссарднинг шахсий ҳаётида мураккаб давр бошлангани ҳақида инглиз ОАВлари хабар тарқатмоқда. Бундай шубҳалар футболчининг рафиқаси Лауранинг ижтимоий тармоқлардаги ҳаракатларидан сўнг пайдо бўлди.

Бельгиялик аёл ижтимоий тармоқдаги саҳифасидан турмуш ўртоғи билан тушган барча суратларини, жумладан, 2019 йилги тўй расмларини ҳам ўчириб ташлаган. У фақат фарзандлари — 9 ёшли Тьяго ва 3 ёшли Амадео билан тушган суратларини қолдирган, холос. Шунингдек, декабрь ойидан бери Лауранинг қўлида никоҳ узуги кўринмаётгани ҳам эътиборни тортган.

Маълумот ўрнида, Леандро ва Лаура қарийб 13 йилдан бери бирга эдилар. Бу воқеалар «канонирлар» учун муҳим паллада — 30 май куни Будапештда «ПСЖ»га қарши бўлиб ўтадиган Чемпионлар лигаси финали арафасида юз бермоқда.

Эслатиб ўтамиз, Троссарнинг «Арсенал» билан амалдаги шартномаси 2027 йилнинг ёзига қадар имзоланган.