Миланнинг «Интер» клуби бош мураббийи Кристиан Киву Италия Кубоги финали доирасидаги «Лацио»га қарши ўйин олдидан ўз фикрлари билан ўртоқлашди. Агар «нерадзуррилар» бугун ғалаба қозонса, 2010 йилдан бери илк бор «олтин дубль»ни (бир мавсумда ҳам чемпионат, ҳам кубокда зафар қучиш) қайд этиши мумкин.

«Биз бўлажак «дубль» ҳақида қайғуриб, унга боғланиб қолмаслигимиз лозим. Бу мавсумда эришган барча ютуқларимизга ҳақлимиз, бироқ ҳозир вазминлик ва совуққонликни сақлаб қолиш муҳим. Финалга хотиржамлик, табассум ва ўйиндан завқ олиш иштиёқи билан чиқишимиз керак. Жўшқинлик ва камтарлик бизни охиригача тарк этмаслиги лозим», — деди Киву ОАВ вакиллари билан суҳбатда.

Эслатиб ўтамиз, «Интер» шу йилнинг май ойи бошида муддатидан олдин чемпионликни расмийлаштирган эди. Яқинда — ўтган шанба куни жамоалар А Серия доирасида тўқнаш келишган ва унда миланликлар 3:0 ҳисобида зафар қучишган.

Италия Кубогининг финал учрашуви Тошкент вақти билан соат 00:00 да бошланади.