Мадриднинг «Атлетико» клуби спорт директори Матеу Алемани жамоа ҳужумчиси Антуан Гризманнга ўринбосар излаш масаласи ҳақидаги саволга жавоб берди. «Матрасчилар»нинг юлдузи аллақачон «Орландо Сити» билан шартнома имзолаган — французнинг трансфери шу йилнинг ёзида амалга ошади.

«Антуаннинг ўрнини тўғридан-тўғри тўлдириб бўлмайди — худди шундай футболчини топишнинг иложи йўқ. Жамоага зарар етмаслиги учун биз муқобил вариантларни қидиришимизга тўғри келади. Бу бўйича аллақачон баъзи ғояларимиз бор. Режаларимиз бош мураббийнинг қарашларига тўлиқ мос келади», — дея Алеманининг сўзларини келтиради Atletico Universe.

Маълумот ўрнида, Диего Симеоне шогирдлари ҳозирда Ла Лига турнир жадвалида тўртинчи поғонани эгаллаб турибди.