«Манчестер Сити» ярим ҳимоячиси Бернарду Силва фаолиятини Италия А Сериясида давом эттириши мумкин.
Tuttosport нашрининг хабар беришича, Туриннинг «Ювентус» клуби 31 ёшли португалиялик футболчини ўз сафига қўшиб олишга жиддий қизиқмоқда. Италияликлар Силвага йилига «тоза» 6 миллион евро маош ва қўшимча 2 миллион евро бонус (ЕЧЛга йўлланма ҳамда голлар ва ўйинлар сони учун) таклиф қилишга тайёр. Келишув 2+1 кўринишида бўлиши кўзда тутилган.
Ҳозирда эркин агент мақомида бўлган Бернарду Силва ушбу таклифни кўриб чиқмоқда. Маълумотларга кўра, у Италиядаги шароитлар ҳақида собиқ «Ювентус» аъзолари — Криштиану Роналду, Жоау Канселу ва Данило билан маслаҳатлашган. Уларнинг барчаси Силвага Турин клубига ўтиш ғоясини маъқуллаб, ижобий фикрлар билдиришган.
Эслатиб ўтамиз, Бернарду Силва 9 йиллик муваффақиятли фаолиятидан сўнг шу ёзда «Манчестер Сити»ни тарк этиши расман тасдиқланган.
