«ПСЖ» дарвозабони Матвей Сафонов Франция чемпионатининг 29-туридан ўрин олган «Ланс»га қарши баҳсдан (2:0) сўнг, парижлик мухлислар уни афсонавий Лев Яшинга ўхшатишаётгани ҳақидаги фикрларга жавоб қайтарди.

«Яшин билан солиштириш масаласига келсак, менимча, бу шунчаки эртак. Бу ерда қиёслашга ўрин йўқ деб ҳисоблайман. Одамлар хоҳлаган гапини гапириши мумкин, лекин бизни солиштириб бўлмайди», — деди Сафонов Okko эфирида.

27 ёшли дарвозабон «Ланс» билан ўйинда 8 та сейв ижро этди ва учрашувнинг энг яхши футболчиси деб топилди.

Ушбу ғалаба эвазига «ПСЖ» муддатидан олдин 2025/26 йилги мавсум чемпионлигини кафолатлади. Париж клуби чемпионат якунига бир тур қолганда 76 очко билан пешқадамлик қилмоқда ва энг яқин таъқибчисини 9 очкога ортда қолдирган.