Бразилия кубоги 1/16 финали доирасида «Сантос» меҳмонда «Коритиба» устидан 2:0 ҳисобида ғалаба қозонди. Учрашувда 34 ёшли Неймар голли узатмани амалга ошириб, жамоасининг муваффақиятига ҳисса қўшди.

Бироқ ўйиннинг энг диққатга сазовор воқеаси 84-дақиқада, футболчи захирага олинаётган пайтда юз берди. Стадиондаги «Коритиба» мухлисларидан бири майдонни тарк этаётган юлдузга қарата: «Сен жаҳон чемпионатига бормайсан!» деб бақирди.

Неймар бунга жавобан кулиб қўйди ва мухлисга «ҳаво бўсаси»ни йўллаб, шундай деди: «Шундайми? Сен эса турнирни уйингда ўтириб томоша қиласан».

Эслатиб ўтамиз, яқинда Бразилия терма жамоаси бош мураббийи Карло Анчелотти Неймарни бўлажак мундиал учун 55 нафар футболчидан иборат кенгайтирилган рўйхатга киритгани ҳақида хабарлар тарқалган эди. Якуний қайдномадан эса фақат 26 нафар футболчи жой олади.