«Барселона» бош мураббийи Ханс-Дитер Флик «Алавес»дан қабул қилинган мағлубиятдан (0:1) сўнг жамоанинг бу мавсумдаги асосий мақсадларидан бири амалга ошмай қолганини тан олди.

Ўйиндан олдин каталонияликлар ушбу мавсумда жами 100 очко жамғаришни ўз олдиларига мақсад қилиб қўйишган эди, бироқ кутилмаган мағлубият бу имкониятга нуқта қўйди.

«Биз чемпионатда 100 очко жамғармоқчи эдик, лекин энди бунинг иложи йўқ. Нима ҳам дердик, бу — футбол. Мағлубиятга қарамай, бугунги ўйинда кўплаб ижобий жиҳатларни кўрдим. Ишлашда давом этишимиз ва кейинги баҳсга тайёргарлик кўришимиз керак», — деди германиялик мутахассис матбуот анжуманида.

Маълумот учун, «Барселона» 36-турдан сўнг 91 очко жамғариб турибди. Жамоа муддатидан олдин чемпионликни нақд қилган бўлса-да, қолган икки турдаги ғалаба ҳам энди уларга 100 очколик довонни забт этиш имконини бермайди.

Айни дамда «кўк-анорранглилар» иккинчи ўриндаги «Реал Мадрид»дан 14 очко олдинда бормоқда, бироқ «қаймоқранглилар» ушбу турдаги ўз ўйинларини ҳали ўтказишмаган.