Мадриднинг «Реал» клуби президентлигига номзод Энрике Рикельме амалдаги раҳбар Флорентино Переснинг муддатидан олдин сайловлар ўтказиш ҳақидаги қарорига муносабат билдирди. Айни дамда Мексикада бўлиб турган тадбиркор Пересга йўллаган очиқ хатида клубнинг келажаги ва сайлов жараёнининг шаффофлиги борасида ўз фикрларини баён қилган.
Рикельме ўз мактубини Переснинг кўп йиллик фаолиятига ҳурмат билдиришдан бошлаган. Унинг таъкидлашича, Перес раҳбарлигида «Реал» нафақат дунё футболида доминантлик қилди, балки ўзининг институционал нуфузини ҳам мустаҳкамлади.
Бироқ номзод сайлов жараёни шошма-шошарлик билан эмас, балки мулоҳаза ва тинчлик билан ўтиши кераклигини таъкидлаган.
«Клуб аъзолари «Реал»нинг келажагини хотиржам муҳокама қилишлари учун вақт ва осойишталикка лойиқдирлар. Биз клубни абадий қилган қадриятлар — намунали хулқ-атвор, рақибга ҳурмат ва мукаммалликка интилишни қандай сақлаб қолиш ҳақида гаплашиб олишимиз керак», — дейилади мактубда.
Шунингдек, Рикельме сайлов жараёнини янада шаффоф ва инновацион қилиш, хусусан, почта орқали овоз бериш ва маълумотларнинг очиқлигини таъминлаш зарурлигини қайд этган. Унинг фикрича, келишилган ҳолда ўтказилган сайлов жараёни клубга яна 20 йиллик барқарорликни кафолатлаши ва ички низоларнинг олдини олиши лозим.
Энрике Рикельме президентлик учун қўйиладиган барча молиявий ва касбий талабларга жавоб беришини алоҳида таъкидлаган.
«Менда «Реал» учун зарур бўлган иқтисодий имкониятлар ва молиявий тажриба мавжуд. Буни мен ижрочи раиси бўлган ва 75 фоиз улушига эгалик қиладиган «Cox» компаниясининг яқинда 2 миллиард долларлик облигацияларни муваффақиятли чиқаргани ҳам тасдиқлайди», — дея қўшимча қилган номзод.
