Мадриднинг «Реал» клуби президенти Флорентино Перес Чемпионлар Лигаси чорак финали доирасида Мюнхеннинг «Бавария»сига қарши кечган жавоб учрашувидан (3:4, умумий ҳисоб — 4:6) сўнг ҳакамлик борасида кескин фикр билдирди.

Мадридликлар ушбу мағлубиятдан сўнг турнирдаги иштирокларини якунлади. Ўйиннинг 86-дақиқасида «қироллик клуби» ярим ҳимоячиси Эдуардо Камавинга рақиб майдонида Ҳарри Кейнга нисбатан фол ишлатди ва ҳуштакдан сўнг тўпни рақибга бермай, вақтни чўзди. Учрашув бош ҳаками Славко Винчич ушбу ҳаракати учун Камавингага иккинчи сариқ карточкани кўрсатиб, уни майдондан четлатди.

Флорентино Перес El Chiringuito телеканали эфирида ҳакамнинг бу қарори ўйин тақдирига таъсир қилганини таъкидлади.

«Ҳакам бизнинг Чемпионлар Лигаси ярим финалига чиқишимизни хоҳламади. Менимча, у Камавингада аллақачон сариқ карточка борлигини англамади. Ҳакамда ёмон ният бўлган деб ўйламайман, лекин у катта хатога йўл қўйди», — деди Перес.

Эслатиб ўтамиз, «Реал» икки ўйин натижасига кўра «Бавария»га имкониятни бой бериб, мусобақа билан хайрлашди.