Таниқли инсайдер Маттео Моретто Мадриднинг «Атлетико» клуби ҳужумчиси Хулиан Альвареснинг келажаги борасидаги сўнгги маълумотларни очиқлади. Журналистнинг сўзларига кўра, айни дамда футболчининг трансфери бўйича расмий таклифлар мавжуд эмас.

«Бир нечта жиҳатга аниқлик киритмоқчиман. «Атлетико» Хулианнинг қолишини истайди, футболчининг ўзи ҳам Мадридда бахтли. Ҳозирда шартномани узайтириш бўйича музокаралар давом этмоқда. Тўғри, Альварес совринлар ютишни хоҳлайди, «Атлетико» ҳам таркибни кучайтириб, совринлар учун курашиш ниятида», — дейди Моретто.

Шунингдек, инсайдер футболчининг кетиши фақат унинг шахсий қарорига боғлиқлигини таъкидлади. Маълумотларга кўра, аргентиналик ҳужумчига «ПСЖ» ва «Барселона» клублари жиддий қизиқиш билдирмоқда, бироқ ҳозирча Мадрид клуби билан ҳеч ким боғланмаган.

«Агар трансфер амалга ошадиган бўлса, унинг қиймати 100 миллиондан 130 миллион еврогача баҳоланиши мумкин. «ПСЖ» ёки «Барса» келишувга ўз футболчиларини қўшиш вариантини ҳам кўриб чиқишлари эҳтимолдан холи эмас», — дея қўшимча қилди журналист.