Taniqli insayder Matteo Moretto Madridning «Atletiko» klubi hujumchisi Xulian Alvaresning kelajagi borasidagi so‘nggi ma’lumotlarni ochiqladi. Jurnalistning so‘zlariga ko‘ra, ayni damda futbolchining transferi bo‘yicha rasmiy takliflar mavjud emas.

«Bir nechta jihatga aniqlik kiritmoqchiman. «Atletiko» Xulianning qolishini istaydi, futbolchining o‘zi ham Madridda baxtli. Hozirda shartnomani uzaytirish bo‘yicha muzokaralar davom etmoqda. To‘g‘ri, Alvares sovrinlar yutishni xohlaydi, «Atletiko» ham tarkibni kuchaytirib, sovrinlar uchun kurashish niyatida», — deydi Moretto.

Shuningdek, insayder futbolchining ketishi faqat uning shaxsiy qaroriga bog‘liqligini ta’kidladi. Ma’lumotlarga ko‘ra, argentinalik hujumchiga «PSJ» va «Barselona» klublari jiddiy qiziqish bildirmoqda, biroq hozircha Madrid klubi bilan hech kim bog‘lanmagan.

«Agar transfer amalga oshadigan bo‘lsa, uning qiymati 100 milliondan 130 million yevrogacha baholanishi mumkin. «PSJ» yoki «Barsa» kelishuvga o‘z futbolchilarini qo‘shish variantini ham ko‘rib chiqishlari ehtimoldan xoli emas», — deya qo‘shimcha qildi jurnalist.