Лиссабоннинг «Бенфика» клуби бош мураббий Жозе Моуриньонинг эҳтимолий кетишига тайёргарлик кўрмоқда ва унга ўринбосар излашни бошлади. Журналист ва инсайдер Николо Скиранинг ижтимоий тармоқда маълум қилишича, клуб Англиянинг «Фулхэм» жамоаси бош мураббийи Марку Силвани асосий номзод сифатида кўрмоқда.
Жозе Моуриньо ҳамда «Реал» раҳбарияти ўртасидаги музокаралар анча илгарилаб кетгани сабабли, «Бенфика» янги бош мураббий излашни тезлаштирган.
Марку Силванинг «Фулхэм» билан шартномаси мавсум сўнгида якунланади ва узайтирилмайди. Бу эса «Бенфика»нинг уни жалб қилиш имкониятини оширмоқда.
ОАВда Марку Силвага бир нечта йирик клублар қизиқиш билдираётгани ҳақида бир неча бор хабарлар чиққан. Шунингдек, у Лиам Росеньор кетганидан кейин ҳали янги мураббий топмаган «Челси» бош мураббийлигига даъвогарлардан бири сифатида ҳам кўрилмоқда.













