Мадриднинг «Реал» клуби ҳужумчиси Килиан Мбаппе «Овьедо»га қарши учрашув вақтида ўз манзилига янграган ҳуштакбозликларга муносабат билдирди.

“Биз ғазабланган одамларнинг фикрини ўзгартира олмаймиз. Бу — уларнинг ўз муносабатини билдириш усули ва буни шахсий қабул қилиш керак эмас. Мени аввал ҳам кўп бор ҳуштакбозлик билан қарши олишган.

Бу — «Реал» футболчиси ва мен каби машҳур инсон ҳаётининг бир қисми. Бунга кўникиш керак. Бу одамларнинг фикри, бундан ҳеч ким ўлмайди.

Жамоа ғалаба қозонмаганида одамлар айбдор излаши табиий ҳолат. Бу барча клубларда учрайди”, — деди Мбаппе.

Француз ҳужумчиси жорий мавсум барча мусобақаларда 42 та ўйинда иштирок этиб, 41 та гол ва 7 та голли узатмага муаллифлик қилди.