Мадриднинг «Реал» клуби юлдузи Килиан Мбаппе клуб президенти Флорентино Перес ҳақидаги фикрлари билан ўртоқлашди. Жамоанинг спортдаги муваффақиятсизликлари ва кийиниш хонасидаги тинимсиз можаролар фонида айрим мухлислар «қаймоқранглилар» раҳбарининг ишидан норозилик билдиришган эди. Бироқ француз ҳужумчиси бу масалада мутлақо бошқача фикрда.
«Флорентино Перес — ўз ишининг жаҳондаги энг зўр устаси. Унинг биз билан эканлигидан жуда омадимиз келган. Унинг «Реал» учун қилган ишларини асло унутиш керак эмас», — дея Мбаппенинг сўзларини келтиради The Touchline нашри.
Чоршанба куни мадридликлар ўз майдонида Гонсало Гарсия ва Жуд Беллингемнинг голлари эвазига «Реал Овьедо»ни мағлуб этишди. Шунга қарамай, пойтахт жамоаси Ла Лига турнир жадвалида иккинчи ўриндан юқорига кўтарила олмайдиган бўлди.
