«Барселона» ҳужумчиси Роберт Левандовски тез орада фаолиятини қаерда давом эттириши бўйича бир қарорга келади. Журналист Карлос Монфорнинг хабар беришича, 37 ёшли польшалик тўпурар Ла Лиганинг навбатдаги тури доирасидаги «Бетис»га қарши ўйингача ўз келажагини белгилаб олмоқчи.
17 май, якшанба куни бўлиб ўтадиган ушбу баҳс «кўк-анорранглилар»нинг жорий мавсумда ўз майдонидаги сўнгги учрашуви ҳисобланади. Айни дамда юлдузли ҳужумчининг агентлари Саудия Арабистонининг иккита клуби билан фаол музокаралар олиб бормоқда. Ҳозирги вазият Левандовски фаолиятини катта эҳтимол билан Яқин Шарқда давом эттиришига ишора қилмоқда.
Эслатиб ўтамиз, футболчининг «Барселона» билан амалдаги шартномаси шу йилнинг июнь ойи охирида ниҳоясига етади. Аввалроқ тарқалган хабарларга кўра, Левандовскига Каталония гранди таклиф қилган янги шартнома шартлари маъқул келмаган. Бу ерда гап нафақат молиявий томонлар, балки спорт лойиҳаси ҳақида ҳам бормоқда — тажрибали ҳужумчи захира ўриндиғида қолиб кетишни истамаяпти.
