Лиссабоннинг «Бенфика» клуби бош мураббийи Жозе Моуриньо Мадриднинг «Реал» клубидаги вазият ҳақида гапириб, ички инқироз ва кучайиб бораётган босим остида қолган жамоа устози Альваро Арбелоани қўллаб-қувватлади.

«Бу менга оғриқ беради, чунки у менинг дўстим. Мен унинг мураббийи бўлган вақтимда у мен учун бор-будини берган футболчилардан бири эди. Бу алоқа абадий қолади», — дея мураббийнинг сўзларидан иқтибос келтирмоқда Madrid Universal.

Моуринью топ-клубдаги мураббийлик фаолияти доимо улкан босим ва доимий танқидлар билан бирга кечишини таъкидлади.

«Мен мураббийликни бошлаган собиқ футболчиларим билан тез-тез ҳазиллашиб тураман: «Бир неча йил кутинг ва сочларингиз қанчалик оқаришини кўрасиз». Шундагина улар футболчи бўлиш мураббийликдан кўра анча осонроқ эканини тушунишади», — деди у.

Эслатиб ўтамиз, Арбелоа мавсум давомида «Реал» бошқарувини қўлга олган эди. Жамоа чемпионатни иккинчи ўринда якунламоқда, аввалроқ эса Чемпионлар лигасидаги иштирокини чорак финал босқичида тўхтатган эди. Шунингдек, «Реал» мамлакат Кубогининг 1/8 финалида мағлуб бўлиб, мусобақадан чиқиб кетган.