«Милан»нинг француз дарвозабони Майк Меньян ҳамон Лондоннинг «Челси» клуби қизиқишлари доирасида бўлиб турибди. Бу ҳақда Gazzetta dello Sport нашри хабар бермоқда.

Манбанинг сўзларига кўра, дарвозабон «Милан» билан шартномасини 2031 йилгача узайтирганига қарамай, «Челси» унга бўлган қизиқишини йўқотмаган. Таъкидланишича, посбон фақат иккита муҳим шарт бажарилган тақдирдагина клубда қолишга тайёр: жамоанинг Чемпионлар лигасига йўл олиши ва Массимилиано Аллегрининг бош мураббий лавозимида қолиши.

Агар вазият ўзгарса, «Челси» шу ёзда Меньянни сотиб олишга ҳаракат қилиб кўради. Жорий мавсумда 30 ёшли Меньян барча турнирларда 39 та ўйинда майдонга тушиб, 35 та гол ўтказиб юборди ва 16 та учрашувда ўз дарвозаси дахлсизлигини сақлаб қолди.