Каталониянинг «Барселона» клуби таркибида тўп сураётган польшалик тўпурар Роберт Левандовски Саудия Арабистонининг «Ал-Ҳилол» жамоаси билан музокаралар олиб бормоқда. Инсайдер Фабрицио Романонинг ижтимоий тармоқларда хабар беришича, ҳозирча томонлар ҳамкорлик бўйича якуний келишувга эришгани йўқ.
37 ёшли марказий ҳужумчида Саудия Арабистони чемпионатидан ташқари, МЛС (АҚШ олий лигаси)да ҳам фаолиятини давом эттириш варианти мавжуд. Левандовски айни дамда ўзи учун қайси йўналиш кўпроқ мос келишини танламоқда. «Барселона»га келсак, «кўк-анорранглилар» польшалик футболчи билан янги шартнома борасидаги музокараларни тўхтатиб қўйган. Жорий мавсумда Левандовски 44 та учрашувда майдонга тушиб, ўз ҳисобига 18 та гол ва 2 та голли узатмани ёздириб қўйди.
