Мадриднинг «Реал» клуби бўлажак бош мураббийи Жозе Моуриньо трансфер бозоридаги асосий нишонларидан бирини белгилаб олди. Португалиялик мутахассис ўз жамоасида айни пайтда Лиссабоннинг «Спортинг» клубида тўп сураётган ярим ҳимоячи Хидемаса Моритани кўришни истамоқда, деб хабар беради Transfer News Live нашри Hochiга таянган ҳолда.

«The Special One» япониялик футболчи «қаймоқранглилар»нинг ярим ҳимоя чизиғи учун қимматли кучайтириш бўлади деб ҳисоблайди. Яқиндагина Морита 31 ёшини қарши олди. Хавбекнинг шартномаси жорий мавсум якунида ниҳоясига етади, шу сабабли уни текинга (эркин агент мақомида) қўлга киритиш имконияти мавжуд.

Жорий мавсумда футболчи «Спортинг» сафида барча мусобақаларда 48 та ўйинда майдонга тушиб, битта гол ва 5 та голли узатма муаллифига айланди. Жозе Моуриньо май ойининг охирига қадар расман «Бенфика»ни тарк этиб, «Реал» бошқарувини қўлга олади.