Марказий ҳимоячи Бенжамен Павар «Марсель»дан «Интер»га қайтади. Бу ҳақда инсайдер Николо Скира хабар бермоқда.
Манбанинг маълумотларига кўра, 30 ёшли француз ижара муддати якунланганидан кейин «Марсель»да қолмайди. Футболчи «Интер» ихтиёрига қайтади, бироқ у бош мураббий Кристиан Кивунинг режаларига кирмайди (бу ҳақда аввалроқ ҳам хабар берилган эди). Таъкидланишича, Милан клуби шу ёзда ҳимоячини сотиб юбориш устида иш олиб боради.
Жорий мавсумда Павар «Марсель» сафида 36 та ўйинда майдонга тушиб, битта гол урди ва учта голли узатмани амалга оширди. Паварнинг «Интер» билан амалдаги шартномаси 2028 йилгача мўлжалланган. Transfermarkt экспертлари футболчини 15 миллион еврога баҳолашмоқда.
