«Ювентус» клубининг футбол стратегияси бўйича директори Жоржо Кьеллини ҳужумчи Душан Влаховичнинг жамоадаги тақдири ҳақида гапирди.
«Бугунги «Фиорентина»га қарши ўйин Влахович учун «Ювентус» либосидаги охиргиси бўлиб қолмайди, деб умид қиламиз», — дея Кьеллинининг сўзларини келтиради инсайдер Николо Скира.
Душан Влахович 2022 йилда «Фиорентина»дан «Ювентус»га 85 миллион евро эвазига ўтган эди. Унинг амалдаги шартномаси 2026 йилнинг 30 июнига қадар мўлжалланган.
Жорий мавсумда сербиялик ҳужумчи туринликлар сафида барча турнирларда 22 та ўйин ўтказиб, 8 та гол урди ва 2 та голли узатмани амалга оширди. «Transfermarkt» портали Влаховичнинг нархини 35 миллион еврога баҳоламоқда.
