Мадриднинг «Реал» клуби марказий ҳимоячиси Дин Хёйсен бўлажак Жаҳон чемпионатини ўтказиб юбориши хавфи остида турибди. Сўнгги пайтларда испаниялик футболчининг жисмоний ҳолати мақтагулик эмас, шу сабабли у «қаймоқранглилар»нинг яқинда «Реал Овьедо» ва «Барселона»га қарши ўтказилган иккита ўйинини ўтказиб юборди.
Diario AS нашри берган маълумотларга кўра, «қизил фурия» бош мураббийи Луис де ла Фуэнте 21 ёшли футболчини мундиалнинг якуний қайдномасига киритиши сўроқ остида турибди. Марказий ҳимоячи таркибдан ташқарида қолиб кетиши ҳеч гап эмас.
Дин Хёйсен 2025 йилнинг март ойидаги дебютидан буён Испания терма жамоаси сафинда жами 7 та ўйин ўтказган. Жорий мавсумда эса у «Реал» таркибида барча турнирларда 38 та учрашувда майдонга тушиб, 2 та гол урди ва 2 та голли узатмани амалга оширди.
