«Аякс» келаси мавсумда ҳам Чемпионлар лигасида иштирок этмайди.

Амстердамликлар УЕФАнинг энг нуфузли клублар турнирига йўлланма олиш имкониятини сақлаб қолишлари учун Эредивизиянинг сўнгги турида «Херенвен»ни мағлуб этишлари шарт эди, бироқ улар дуранг ўйнашди — 0:0.

Нидерландиянинг энг совриндор клуби охирги уч мавсум ичида иккинчи бор чемпионатни бешинчи ўринда якунлади ва ЕЧЛ йўлланмасидан маҳрум бўлди. Ушбу омадсиз давргача «Аякс» охирги марта 2000 йилда кучли тўртликдан ташқарида қолган эди.

Энди амстердамликлар Конференциялар лигаси йўлланмаси учун плей-офф босқичида кураш олиб боришади. Эслатиб ўтамиз, Нидерландия номидан Чемпионлар лигасида ПСВ ва «Фейеноорд» (тўғридан-тўғри умумий босқичда), шунингдек, НЕК (саралаш босқичида) иштирок этади.