«ПСЖ» бош мураббийи Луис Энрике Франция чемпионатининг 34-турида «Париж» клубидан қабул қилинган мағлубиятдан сўнг ўз фикрларини билдирди. Учрашув 1:2 ҳисобида якунланди.

«Бугунги ўйиндан ҳеч қандай ижобий жиҳатни топа олмадим. Шубҳасиз, бу мен бу ерда ўтказган уч йил ичидаги энг ёмон ўйин бўлди, қониққаним йўқ. Усман Дембеле кичик муаммога дуч келди (жароҳат олди), умид қиламанки, бу жиддий эмас», — дея Энрикенинг сўзларини келтирмоқда L1+.

«ПСЖ» 2025/26 йилги мавсум якунларига кўра Франция чемпионига айланди. Парижликлар 34 та учрашувда 76 очко жамғаришди. Энг яқин таъқибчи билан орадаги фарқ 6 очкони ташкил этди.

30 май куни «ПСЖ» Чемпионлар лигаси финалида «Арсенал»га қарши майдонга тушади. Учрашув старти Тошкент вақти билан соат 21:00 да режалаштирилган.