Мадриднинг «Реал» клуби бош мураббийи Альваро Арбелоа жамоанинг юлдузли ҳужумкор дуэти ҳақидаги саволга жавоб берди. Якшанба куни Ла Лига доирасида «Севилья»га қарши кечган учрашувда Килиан Мбаппе ва Винисиус Жуниор «қаймоқранглилар»нинг ҳужум чизиғида ўзаро боғлам ҳосил қилишди. Бразилиялик футболчи 15-дақиқада гол уриб, меҳмонларга минимал ҳисобдаги ғалабани тақдим этди.
«Мбаппе ва Винисиус бизнинг сафимизда тўп сураётганидан жуда хурсандмиз. Дунёнинг исталган клуби уларни ўз таркибида кўришни истаган бўларди», — деди матбуот анжуманида Арбелоа.
Мбаппе сўнгги тур олдидан Ла Лига тўпурарлар пойгасида 24 та гол билан пешқадамлик қилмоқда, Винисиус эса «Барселона» аъзолари Ламин Ямал ва Ферран Торрес билан бир қаторда рўйхатда тўртинчи ўринни эгаллаб турибди (уларнинг ҳар бирида 16 тадан гол мавжуд).
