«Барселона» бош мураббий Ханс-Дитер Флик маҳаллий вақт билан 18 май куни соат 14:00 да клуб билан янги шартнома имзолашини тасдиқлади. Маросим клуб президенти Жоан Лапортанинг офисида ёпиқ форматда бўлиб ўтади, деб хабар бермоқда Marca.
Аввалроқ томонлар ҳамкорликни узайтириш бўйича оғзаки келишувга эришган эдилар. Германиялик мутахассис 2028 йилнинг июнь ойигача мўлжалланган, яна бир мавсумга узайтириш имконияти бўлган келишувга қўл қўйиши кутилмоқда.
Клуб ва мураббий ўртасидаги музокаралар ҳеч қандай мураккабликларсиз ўтди. Флик Барселонадаги ҳаётидан ва жамоа билан ишлашдан мамнун, раҳбарият эса икки мавсум ичида 5 та турнирда ғолиб чиққан мураббийга тўлиқ ишонч билдирмоқда.
Шартнома имзоланишидан аввал Флик Рафа Юсте ва Рональд Араухо ҳамроҳлигида клуб музейига ташриф буюради. У ерда жамоа томонидан жорий мавсумда қўлга киритилган иккита кубокни музейга топшириш маросими бўлиб ўтади.
