Ҳужумчи Эндрик Мадриднинг «Реал» клубига қайтиш олдидан «Лион» сафидаги сўнгги ўйинини ўтказди. Бразилиялик футболчи Лига 1 нинг сўнгги туридан ўрин олган «Ланс»га қарши баҳсда асосий таркибда майдонга тушди, бироқ «тўқувчилар»ни ўз майдонларидаги йирик ҳисобли (0:4) мағлубиятдан қутқариб қола олмади.

Учрашувнинг 71-дақиқасида захирага олинаётган 19 ёшли футболчи маҳаллий мухлислар билан хайрлашди. Унинг ижара муддати ўз ниҳоясига етмоқда. Эндрик «Лион» сафига шу йилнинг январь ойида келиб қўшилган эди. Умумий ҳисобда ҳужумчи Франция жамоаси учун 21 та ўйин ўтказиб, 8 та гол ва 8 та голли узатмага муаллифлик қилди.

Ўйинчи янги мавсумни «Реал»да бошлайди, унинг Мадрид клуби билан 2030 йилгача мўлжалланган шартномаси бор.