Португалиялик мутахассис Жозе Моуриньо, агар Мадриднинг «Реал» клуби бош мураббийлигига тайинланса, ўз ёнида кимни ёрдамчи сифатида кўришни хоҳлаётгани ҳақида бош қотирмоқда. Бу ҳақда Ok Diario нашри хабар бермоқда.

Аввалроқ ёзилганидек, биринчи рақамли номзод сифатида «қаймоқранглилар» таркибида ҳужумчи ўлароқ кўплаб совринларни қўлга киритган Рауль Гонсалес Бланко кўрилмоқда. Бироқ унинг клуб раҳбарияти билан муносабатлари мураккаб экани фонида жамоага қайтиши амримаҳол бўлиб турибди.

Муқобил номзодлар сифатида Тони Кроос ва Диего Лопес исм-шарифлари тилга олинмоқда. Улар ҳам ўз вақтида «Реал» шарафини ҳимоя қилишган. Таъкидлаб ўтиш жоизки, Тони Крооснинг «Реал» тизимида иш бошлаши ҳақидаги гап-сўзлар Моуриньонинг келиши ҳақидаги миш-мишлар пайдо бўлишидан олдин ҳам мавжуд эди.