«ПСЖ» Лига 1 мавсумини дербида «Париж» клубидан қабул қилиб олинган 1:2 ҳисобидаги мағлубият билан якунлади. Учрашувнинг биринчи бўлими давом этаётган бир пайтдаёқ бош мураббий Луис Энрике ҳужумчи Усмон Дембелени захирага олди. Бу ҳолат Париж клуби мухлисларини хавотирга сола бошлади, чунки яқин кунларда жамоани ЕЧЛ финали кутиб турибди.
Душанба куни «ПСЖ» расмий сайтида Дембеленинг соғлиғига оид баёнот эълон қилинди. Лига 1 грандининг маълум қилишича, футболчи ўнг оёқ болдир мушагида ноқулайлик ҳис қилгани сабабли, эҳтиёт чораси сифатида алмаштирилган.
Яқин кунлар ичида Дембеле шифокорлар назоратида бўлади ва даволаниш муолажаларини ўтайди. Парижликларнинг берган баёнотига таянадиган бўлсак, Дембеленинг 30 май куни бўлиб ўтадиган Чемпионлар Лигаси финалидаги иштирокига ҳеч нарса таҳдид солаётгани йўқ.
