«Манчестер Сити» клуби ўз таркибида «Мавсумнинг энг яхши футболчиси» соврини учун даъвогарлик қилаётган якуний уч нафар финалчи номини эълон қилди. Ушбу учликдан қуйидаги футболчилар жой олди: Жереми Доку, Абдуқодир Ҳусанов ва Нико О’Райли.

Ҳусанов ҳақида гапирадиган бўлсак, 22 ёшли ўзбекистонлик ҳимоячи жорий мавсумда жамоа сафида 36 та учрашувда майдонга тушди ва сермаҳсул ҳаракатлар (гол ёки пас) амалга оширмади. Шунга қарамай, «Манчестер Сити» мухлислари Абдуқодирни ҳимоядаги ишончли ва мазмунли ўйинлари учун мунтазам равишда олқишлаб келишди.

Дам олиш кунлари «Манчестер Сити» «Уэмбли» стадионида бўлиб ўтган финалда «Челси»ни 1:0 ҳисобида мағлуб этиб, Англия Кубоги соҳибига айланди. Эндиликда «шаҳарликлар» Премьер-лига доирасида «Борнмут» (19 май) ва «Астон Вилла» (24 май) клубларига қарши кечадиган муҳим баҳсларга тайёргарлик кўришмоқда. Айни дамда «Манчестер Сити» АПЛ турнир жадвалида пешқадам «Арсенал»дан икки очко ортда қолган ҳолда иккинчи ўринни эгаллаб турибди.