«Манчестер Юнайтед» бош мураббийи Майкл Кэррик АПЛ жорий мавсумининг барча ўйинларида иштирок этган жамоа ҳимоячиси Люк Шоу ҳақида юқори фикр билдирди.
— Люк Шоунинг ҳозиргача АПЛнинг барча ўйинларида қатнашгани қанчалик аҳамиятли ва у буни кейинги мавсумда ҳам такрорлай оладими?
— Ўйинлар сони кўп бўлганда бунга эришиш ҳар ким учун қийин. Баъзан бу сенинг айбинг бўлмайди. Афсуски, жароҳатлар — футболнинг бир қисми ва вазиятга таъсир қилувчи бошқа омиллар ҳам бор. Шу боис, ҳар бир ўйинда асосий таркибда майдонга тушиш имконияти — бу ҳақиқатан ҳам фантастик натижа. Кейинги мавсум — янги мавсум ва унда турлича ўйинлар бўлади. Кўп нарса мослашишга боғлиқ, аммо бу шунингдек ёш, тажриба ва ўз организмига эътибор бера олиш билан ҳам боғлиқ. Люк ҳозир катта тажрибага эга бўлган босқичга етди. У анчадан бери шу ерда ва клубни яхши билади. Кейинги мавсумда у нечта ўйинда майдонга тушишидан қатъи назар, тажрибаси айниқса қадрли бўлади.
— Сизнингча, Люк Шоу, Харри Магуайр ва Кобби Майну қаторида Англия терма жамоасидан жой олишга лойиқми?
— Мен бунга мутлақо ишонаман, лекин бунга таъсир ўтказа олмайман. Аммо унинг барқарорлиги ва ўйин даражаси, тажрибаси ва маҳорати шубҳасиз. Люк — фантастик ҳимоячи ва ўйлашимча, уларнинг учаласида ҳам яхши имкониятлар бор, — дея Кэррикнинг сўзларидан иқтибос келтирмоқда манкунианликлар расмий сайти.
Кэррикнинг Шоу ҳақидаги фикрлари жуда ўринли. Жароҳатлар билан боғлиқ мураккаб даврлардан сўнг Люкнинг бундай барқарорликка қайтгани ва «Юнайтед»нинг асосий етакчиларидан бирига айлангани жамоа учун катта ютуқ. Кейинги йилларда у ёш футболчилар учун ҳақиқий устоз бўла олади.
