Швеция терма жамоаси бош мураббийи Грэм Поттер Жаҳон чемпионатида иштирок этиши керак бўлган 26 нафар футболчидан иборат рўйхатни тақдим этганига бир ҳафта бўлди. Ушбу рўйхатда «Барселона» вингери Руни Бардагжи йўқ эди.

Aftonbladet нашрининг хабар беришича, 20 ёшли футболчининг таркибдан четда қолишига нафақат унинг ўйинидаги муаммолар, балки терма жамоадаги хулқ-атвори ҳам сабаб бўлган. Бардагжи март ойида терма жамоага чақирилган эди, бироқ майдонда бирор дақиқа ҳам ҳаракат қилмади. Шундан сўнг футболчи мураббийлар штабидан тушунтириш талаб қилди. Унга бу қарор фақатгина футболга оид сабаблар билан боғлиқлиги айтилди.

Кейинчалик, жамоанинг Жаҳон чемпионатига йўлланма олганини нишонлаш маросимида, шериклари муваффақиятни байрам қилаётган бир пайтда, футболчи ўз норозилиги ва ғазабини очиқчасига намойиш этди. Швецияликлар бош мураббийи Грэм Поттер бундай хулқ-атворни худбинлик деб баҳолади ва бу иллат футболчининг истеъдодидан устун келади деган қарорга келди. Поттер жамоа ичида максимал даражада соғлом муҳитни сақлаб қолмоқчи ва жамоавий руҳ учун ҳатто кучли футболчилардан ҳам воз кечишга тайёр.

Бардагжи ўтган ёзда «Барселона»га ўтган эди. Жорий мавсумда у 28 та учрашувда майдонга тушиб, тахминан 900 дақиқа ҳаракат қилди, 2 та гол урди ва 4 та голли узатмани амалга оширди. Футболчи Швеция терма жамоаси сафида 3 та ўйинда майдонга тушишга улгурган.