Туриннинг «Ювентус» клуби «Манчестер Сити» ярим ҳимоячиси Бернарду Силвани ёзги трансфер ойнасида эркин агент сифатида ўз сафига қўшиб олишни мақсад қилган. Бироқ ушбу трансфернинг амалга ошиши жамоанинг Еврокубоклардаги мавқеига тўғридан-тўғри боғлиқ. Бу ҳақда «Calciomercato» нашри хабар бермоқда.
Манбанинг таъкидлашича, агар «Ювентус» мавсум якунига кўра Чемпионлар лигаси йўлланмасини қўлга кирита олмаса, молиявий жиҳатдан португалиялик юлдузнинг маош бўйича талабларини қондира олмайди ва трансфер бозоридаги бошқа рақобатчиларга ютқазиб қўяди. ЕЧЛдан тушадиган даромад клуб учун ушбу битимни молиялаштиришда бош омил бўлиши кутилмоқда.
Айни дамда «Ювентус» А Серия турнир жадвалида 6-ўринни эгаллаб турибди. Бироқ туринликлар захирасида яна бир ўйин мавжуд бўлиб, улар кучли тўртликка кириш ва ЕЧЛ йўлланмасини нақд қилиш учун курашни давом эттиришмоқда.
Эслатиб ўтамиз, Бернарду Силванинг «Манчестер Сити» билан шартномаси шу ёзда якунига етади.
