Turinning «Yuventus» klubi «Manchester Siti» yarim himoyachisi Bernardu Silvani yozgi transfer oynasida erkin agent sifatida o‘z safiga qo‘shib olishni maqsad qilgan. Biroq ushbu transferning amalga oshishi jamoaning Yevrokuboklardagi mavqeiga to‘g‘ridan-to‘g‘ri bog‘liq. Bu haqda «Calciomercato» nashri xabar bermoqda.

Manbaning ta’kidlashicha, agar «Yuventus» mavsum yakuniga ko‘ra Chempionlar ligasi yo‘llanmasini qo‘lga kirita olmasa, moliyaviy jihatdan portugaliyalik yulduzning maosh bo‘yicha talablarini qondira olmaydi va transfer bozoridagi boshqa raqobatchilarga yutqazib qo‘yadi. YECHLdan tushadigan daromad klub uchun ushbu bitimni moliyalashtirishda bosh omil bo‘lishi kutilmoqda.

Ayni damda «Yuventus» A Seriya turnir jadvalida 6-o‘rinni egallab turibdi. Biroq turinliklar zaxirasida yana bir o‘yin mavjud bo‘lib, ular kuchli to‘rtlikka kirish va YECHL yo‘llanmasini naqd qilish uchun kurashni davom ettirishmoqda.

Eslatib o‘tamiz, Bernardu Silvaning «Manchester Siti» bilan shartnomasi shu yozda yakuniga yetadi.