«Реал» клуби Жозе Моуриньонинг бош мураббий лавозимига қайтишини қачон эълон қилиши маълум бўлди.

Аввалроқ, 63 ёшли португалиялик мутахассис «Мадрид»да Альваро Арбелоанинг ўрнини эгаллаши ҳақида хабар берилган эди — қироллик клуби мураббийни «Бенфика»дан 3 миллион евро эвазига сотиб олади ва у билан икки йиллик шартнома имзолайди.

ESPN нашри тарқатган маълумотларга кўра, «Реал» Моуриньонинг тайинланиши ҳақидаги расмий баёнотни мавсум якунланганидан сўнг — якшанба ёки душанба куни эълон қилади. Ла Лиганинг сўнгги тури ўйинлари 23-24 май кунлари бўлиб ўтади ва «қаймоқранглилар» шанба куни ўз майдонларида «Атлетик Бильбао»ни қабул қилишади.

Таъкидланишича, «Мадрид» президенти Флорентино Перес Моуриньонинг шартномасига алоҳида банд қўшиш имкониятини кўриб чиққан. Ушбу бандга кўра, агар клуб президентлиги учун ўтказиладиган сайловларда Энрике Рикельме ғалаба қозонса, у португалиялик мураббий билан ҳамкорликни рад этиши ва бошқа номзодни танлаши мумкин бўлади.

Эслатиб ўтамиз, Моуриньо аввал ҳам «Реал»ни бошқарган (2010-2013) ва клуб билан биргаликда Ла Лига, Испания Кубоги ҳамда Суперкубогида ғолиб чиққан эди. Мутахассис ўзининг сўнгги совринини 2021/22 йилги мавсумда «Рома» бошқарувида қўлга киритган — ўшанда римликлар Конференциялар Лигасида зафар қучишган эди.