«Саутгемптон» клуби рақибларни яширинча кузатгани (жосуслик қилгани) учун Чемпионшип плей-офф финалидан четлаштирилди, деб хабар бермоқда Sky News журналисти Роб Харрис.

Аввалроқ, «Саутгемптон» таҳлилчиси (аналитиги) плей-офф босқичидаги илк учрашув олдидан «Мидлсбро» жамоасининг машғулотини видеога олаётган ва тактик режаларини суратга тушираётган вақтда қўлга тушгани маълум бўлган эди. Англия футбол лигаси (EFL) ушбу ҳолат бўйича суриштирув ишларини бошлаган.

Икки ўйин натижасига кўра, «Саутгемптон» «Мидлсбро»дан устун келган (0:0, 2:1) ва финалга йўл олган эди. Жамоа 23 май куни АПЛ йўлланмаси учун «Халл Сити»га қарши майдонга тушиши керак эди.

Эндиликда «Саутгемптон» нафақат плей-офф финалидан четлатилди, балки Чемпионшипнинг кейинги мавсуми учун ҳисобидан 4 очко олиб ташланиши кўринишидаги жазога ҳам тортилди.

Бундай кескин жазо фақатгина плей-офф ярим финали олдидан «Мидлсбро» машғулотларини яширинча кузатгани учунгина эмас, балки чемпионат доирасида декабрь ойида «Оксфорд» ҳамда апрель ойида «Ипсвич»га қарши ўйинлар олдидан ҳам шундай ишга қўл урилгани аниқлангани сабабли қўлланилди.

Таъкидланишича, ушбу қарор ортидан «Саутгемптон» Премьер-лигага қайтган тақдирда ишлаб топиши мумкин бўлган камида 200 миллион фунт стерлинг миқдоридаги даромаддан маҳрум бўлди.