Англия терма жамоасининг собиқ сардори Уэйн Руни «Манчестер Сити» бош мураббийи Хосеп Гвардиолани «Манчестер Юнайтед»нинг афсонавий устози Алекс Фергюсон билан таққослади.

Рунининг сўзларига кўра, айнан Гвардиола ўз даврининг энг яхши мураббийи ҳисобланади, Фергюсон эса инглиз футболининг аввалги авлодида ҳукмронлик қилган.

«Мен унинг Алекс Фергюсон билан таққосланганини кўп кўрдим. Мен учун Фергюсон — барча даврларнинг энг буюк мураббийи, аммо Пеп ўз авлодида, шубҳасиз, катта фарқ билан энг зўридир», — деди Руни BBC эфирида чиқиш қилар экан.

Гвардиола мавсум якунланганидан кейин «Манчестер Сити»ни тарк этиши кутилмоқда. Испаниялик мутахассис жамоадаги фаолияти давомида 20 та совринни қўлга киритди, улар орасида 6 та чемпионлик титули ва Чемпионлар Лигасидаги ғалаба ҳам бор.

«Ҳамма Гвардиоланинг битта клубда 10 йил давомида ишлагани қанчалик ақл бовар қилмас ҳолат экани ҳақида гапирмоқда. Аммо Фергюсон «МЮ»да 26 йил давомида фаолият юритган. Бу муддат ҳақида ўйлаб кўрсангиз — шунчаки ҳайратда қоласиз», — деди собиқ ҳужумчи.

Руни, шунингдек, мураббийларни тўғридан-тўғри таққослаш қийинлигини таъкидлаб ўтди. «Фергюсон «Юнайтед»га келган вақтда клуб бутунлай бошқача вазиятда эди. У жамоани амалда қайтадан қуриши ва уни инглиз футболи чўққисига қайтариши керак бўлган. Пепга эса ҳамма нарсани нолдан бошлаш тўғри келмади».

Шу билан бирга, Руни Гвардиоланинг инглиз футболига ўтказган таъсирини юқори баҳолади. «У инглиз футболининг қиёфасини бутунлай ўзгартириб юборди. Унинг ғоялари бутун тизим бўйлаб — топ-клублардан тортиб, болалар ва ҳаваскорлар жамоаларигача тарқалди. Дарвозабондан бошлаб қисқа паслар орқали ўйнаш, тўп назорати — буларнинг барчаси Пеп туфайли оддий ҳолга айланди».

Эслатиб ўтамиз, «Манчестер Сити»да Гвардиоланинг ўрнини Энцо Мареска эгаллаши кутилмоқда.