«Челси» бош мураббийи вазифасини бажарувчи Калум Макфарлейн АПЛнинг 37-турида «Тоттенхэм» устидан қозонилган ғалабадан (2:1) сўнг ўз фикрларини билдирди.

«Энг муҳими — натижа. Менимча, биз ҳақиқатан ҳам жуда яхши ўйин кўрсатдик. Шанба кунги баҳсдан сўнг (Англия Кубоги финалида «Манчестер Сити»дан учралган 0:1 ҳисобидаги мағлубият назарда тутилмоқда) бизга куч ва шиддат етишмаётган эди. Майдонда курашиш ва бир жамоа бўлиб жипслашиш керак эди, менимча, буни аъло даражада уддаладик.

Биз ҳамма нарсани олдиндан режалаштира олмадик, чунки вазият жуда тез ўзгариб кетди. Шанба кунги ўйин ҳис-туйғуларга бой бўлди, чунки биз охиригача ўйинда қолгандик. Якшанба куни дам олишимиз, кейин эса жон сақлаб қолиш учун курашаётган «Тоттенхэм»га қарши ўйинга тайёргарлик кўриш учун бор-йўғи бир кунимиз бор эди. Курашда, матонат ва қатъиятда уларга муносиб қаршилик кўрсатишимиз керак эди.

Баъзида ўйинда ҳис қилинадиган босим ва шиддат ҳақида гапиришарди. Кийиниш хонасидаги баъзи футболчилар бу шундай бўлишини билишган, аммо биз ҳис-туйғуларга берилмаслигимиз керак эди», – деди Макфарлейн.