«Бавария» раҳбари Герберт Хайнер Майкл Олисенинг келажаги ҳақида фикр юритди. Французлик вингер Мюнхен гранди таркибида дунёнинг энг яхши футболчиларидан бирига айланди. Миш-мишлар футболчини доимий равишда Англияга қайтиши мумкинлиги билан боғламоқда, шунингдек, Европанинг бошқа топ-клублари томонидан бўлаётган қизиқишлар ҳақида ҳам гап-сўзлар юрибди.

«Биз Олисени мутлақо ўз сафимизда сақлаб қолмоқчимиз. Унинг шартномаси 2029 йилгача мўлжалланган. Майкл топ-даражадаги жамоада ўзини кўрсатиш имкониятига эга бўлгач, ақл бовар қилмас даражада ўсишга эришди. Бизнинг ҳужум чизиғимиз жуда кучли — камдан-кам клублар бундай ҳужум вакиллари билан мақтана олади. Бу ҳам Олисенинг фойдасига ишлайди. Бу ерда у ҳар мавсумда барча совринлар учун кураша олади. Мен унинг вазиятида жамоадан кетиш ҳақида ўйлашга ҳеч қандай сабаб кўрмаяпман», — деди Хайнер Sport Bild нашрига берган интервьюсида.

Шанба куни «Бавария» Германия Кубоги финалида «Штутгарт»га қарши майдонга тушади. Бундан аввал Венсан Компани шогирдлари Бундеслига чемпионлигини қўлга киритишган эди.